Guddoomiyaha ururka Xisbul Islaam ayaa shir jaraa'id oo uu ku qabtay magaalada Muqdishu kaga hadlay sida uu u arko ku biiriddii uu ururka Al-Shabab ku biiray ku xigeenkiisa ahna madaxii kooxda Raaskaambooni Sheekh Xasan Turki.

Guddoomiyaha Ururka Xisbul Islam Sheekh Xasan Daahir Aweys ayaa si kulul u cambaareeyey ku biiriddii uu ku xigeenkiisa, Sheekh Xasan Cabdullaahi Xirsi “Sheekh Xasan Turki” uu ugu biiray ururka Al-Shabab.

Sheekh Xasan Daahir Aweys waxa uu tallaabadaasi ku tilmaamay arrin shakhsi ah, waxana uu ku eedeeyey ururka Al-Shabab inay jebiyeen heshiis ay hore u wada gaareen oo ahaa, waa sida uu hadalka u dhigaye, “inaan dadka la isku dirin la iskana bililiqaysan”.

Hadalkan ayaa Sheekh Xasan Daahir Aweys uu ka sheegay shir jaraa'id oo uu maanta ku qabtay magaalada Muqdishu.

Xigasho...... SomaliVOA